2Cor 11 | BDD | STEP | Cigu gwae bewa gide yauyaule yagwaegwae, ma hesi 'eguma wa'alama'i'ita, 'igu nuwatuhu yahepwaila latuwe 'oimiya.

2 Corinthians 11

Paulo 'ina paihowa

1 Cigu gwae bewa gide yauyaule yagwaegwae, ma hesi 'eguma wa'alama'i'ita, 'igu nuwatuhu yahepwaila latuwe 'oimiya.

2 Weyahina nuwanuwagu 'omi, gidemusa Yehoba nuwanuwana tauda, 'oinega yagwae hemisaegomiya Keliso 'oina, 'omi gidemusa gumalaulau 'aigeda 'ina mumuga bwebwe'ana mabwaiyana, ma loheya ba'idana sihai. 3 Ma hesi ya'ateyohowa weyahimi, 'amuge ma 'imi nuwatuhu si'wani ma 'imi 'atetagwala Keliso 'oina wa'ebesine, gide mwalo mwata Ibe 'i'aboweya 'ina gwae hotohoto 'oinega, ta Ibeina 'iwe'a.

4 Coinega 'eguma taiya 'itautauyawa ma Yesu tetelina 'oimiya 'ilohatotowe ma geya tauma 'ima lohatoto gide, tauna 'oina watagwa tagwalegomi. Comi wasa bwebwe'ana 'oina watagwala pwaiyegomiya ta Yaluyaluwa Tabuna 'oimiya walotohoya, ma tuwa hali tetela ma hali yaluyaluwa 'oidiya watagwa tagwalegomi.

5 Cimi tologuguyao hauhaudiyedi 'omi wanuwatuhuya 'abehega sihane sinegauwa, ma hesi geya sowasowahidi. 6 Ceguma geya yada gwae bwaibwaina, ma hesi yasanapu moisa ma tuta mabwaiyana 'igu sanapuina yahe'ita pwaidiya 'oimiya.

7 Mwalo Yehoba wasana 'oimiya yalohatotoweya, ma geya 'eta maisa weyahina yagwaegwae 'oimiya, 'oinega wanuwatuhuya yalopuiya weyahina taugu ya'abi suluhegauwa ma 'abehega 'omi wahane. 8 Cana 'ita gide yayagayagaha hali hekalesiyao 'oidiyega, weyahina mane si'ebwaegauwa ma 'abehega 'omi weyahimi yapaihowa.

9 Wete tutaina 'imi tupwa yamiyamiya ma yagomagomale geya yada 'ahwanoiya 'oimiya, ma hesi tupwana tasidao Masidoniya 'oinega sitauyama ta lema si'ebwaegauwa; weyahina geya nuwagu ma mwau 'oimiya yalagu 'agu 'e'ahai weyahina. Mwalo geya 'aigeda mwau 'oimiya yalagu, ma tuta sinaonaoma 'oidiya wete sahena yalagulagu. 10 Cigu gwae hane bewa gwae moisa Keliso 'oinega, ma sahena 'aigeda taiya 'igu gwae bewa 'i'eto'etobode Akaya tupwanao mabwaiyadi 'oidiya.

11 Ma to'aha huhuna? Nuwana 'igu gwae bewa weyahina ta yalogwahategomiya? Sahena! Yehoba 'isanapu bwaibwainigauwa yahelauwegomiya.

12 Wete 'igu paihowa weyahimi tuwa 'abwa yada paipaihowa, ma 'oinega ya'abihe lolagudi taudi togwae gagasa sigwaeya 'abehega 'idi paihowa 'oimiya gide taugu 'igu paihowa. 13 Weyahina to'abowedi 'adi 'ita gide Keliso 'ana tohepwailao ma hesi galana sipaipaihowa. 14 Taudi gide Seitani, mumugana galana, ma hesi 'ana 'ita 'ibuiya gide anelose 'asi'asilalana. 15 Coinega sahena nuwami 'ihehenainaida 'eguma Seitani 'ina topaihowao wete 'adi 'ita sibuidi ma topaihowa dumwaludi gide. Ma tuwa, tuta 'ebelosaloha 'oina 'idi mumuga galadi weyahidi taudi nata sigala hedade.

Paulo 'ina muyamuyao

16 Yada hegwaegomi wete sahena wa'ahwa'ahwa yauyaulegau, ma 'eguma wa'ahwa yauyaulegau tuwa, 'ausala, ma 'igu gwae yauyaule wahesagohe, ma 'oinega tupwana yada gwae gagasa.

17 Cigu gwae gagasa bewa geya 'ida Bada 'ina loinega, ma hesi yauyaulegu tuwa. 18 Weyahina tomota mabwaiyadi sigwaegwae gagasa ginaula bale'u weyahidi, 'oinega taugu wete yada gwae gagasa taudi gide.

19 Ma 'omi hesi sanasanapumi ta tomota yauyauleidi 'oidiya wa'atetagwala, 20 'eguma paihowa mwaudi si'ebwaegomi, ma 'oinega 'oimiyega siyagayagaha, ma si'abowegomiya, ma ma'idi nuwahane manimiya sisapi. 21 Ma taugu we'awe'agu, 'oinega geya yada sapigomiya, ta bewa 'ebedeba mwadina 'oiguwa.

Ta 'eguma 'imi tologuguyaedi to'aha weyahidi sigwaegwae gagasa, hesi tuwa taugu yahetohe yauyaule ma yagwae gagasa ginaulaedi weyahidi.

22 Ceguma taudi meIbeliu, taugu gide.
Ceguma taudi Isileli 'ina susuwao, taugu gide.
Ceguma taudi Ebalahamo tubunao, taugu gide.
23 Ceguma taudi Keliso 'ina hewahewaliyao bwebwe'adi, taugu 'ina hewali bwebwe'ana hedade.
Cigu gwae bewa gide yauyauleigu. Cigu guibiga 'oinega yanugeta sinediya, 'igu luhu deliya baibaiwa hedade, 'agu sapiyao wete baibaiwana ta tuta mabwaiyana 'oidiyega 'abehega tuwa nata ya'amasa.

24 MeYudiya balaeyega sisapigauwa, 'ana baibaiwa teti naini, ta sapiina bewa gide ma nima 'ai'aigeda yalobediya. 25 Matoi wete sihunugauwa 'aiwe 'oidiyega, ma'aigeda dimwega sihunu dadanegauwa, matoi waga 'oinega yadamana ni'u 'awawa, ma sabwelo 'aigeda ma nihuwana 'aigeda 'idoegauwa.

26 Ma wete 'igu 'adau 'oidiyega 'ebehesilae yalobediya we'aha madoudi ma toyagahao 'oidiyega, ma 'igu bodao meYudiya 'oidiyega, ma taudi geya meYudiya 'oidiyega, ta 'asa madoudi 'oidiyega, ta pwatula 'oidiya, ta wete ni'u 'awawa, ma wete tasidao 'abo'aboidi 'oidiyega, 27 'ima paihowa madouna, ma miyamwau 'adi tuta 'oidiya, nihuwana geya yada 'enowa, ma gomale ta tani'oyahala, wete tuta tupwana baibaiwana geya 'agumo, ta geya 'igu hadamo, ma geya 'agu 'wamamo tuta gogai 'oidiya. 28 Ma wete sabwelo mabwaiyana 'oidiya yanuwanuwatuhu madouna tohekalesiyao tupwa baibaiwadi weyahimi. 29 Coinega 'eguma taiya 'iwe'a, taugu wete gide yawe'a, ma 'eguma taiya 'ebetupa 'oina 'ibe'u, beno 'igu 'ebe nuwagala.

30 Ma wa'ita, 'igu gwae gagasa 'igu we'aomo weyahidi. 31 Yehoba tauna 'ida Bada Yesu tamana tada hepwatuwe hataya, ma tauna 'isanasanapugau 'abehega 'igu he'ote'otetela bewa gwae moisa. 32 Mwalo, kini Alesitasi 'ina tuta toloina 'aigeda 'asa Damasiko 'oina 'itoho waiwai ma 'abehega ma'ina tolo'alehao si'abiyahigau, 33 ma hesi 'iyagwao si'abihetegauwa, ta 'ali 'ana 'ahwa'eda tabwaninega siso'eya, ta 'oinega silagu suluhegauwa kodowega bale'uwa, ta 'agu 'alehaowedi 'oidiyega yadena.